Kryeministri Edi Rama në takimin përmbyllës të fushatës elektorale, u ndal te investimi në sport dhe krijimi i Akademisë dhe shkollës së futbollit në Durrës. Rama theksoi se është e domosdoshme që Durrësi të bëhet një bashki model për të tjerat dhe për këtë po punohet.
“Për sa i përket infrastrukturës sportive dhe aksesit të fëmijëve dhe të rinjve në sport, kemi ndërtuar një numër shumë të lartë palestrash, ndërkohë që më parë numëroheshin me gishtat e dorës. Sot kemi qindra palestra, kemi një lëvizje të re që ka filluar në shkolla. Sot shumë vende po vuajnë largimin e fëmijëve nga sporti dhe mbylljen e tyre pas ekraneve të kompjuterëve dhe telefonave dhe kanë problemin e madh të obezitetit të fëmijëve”, tha Rama.
Ai siguroi se Durrësi do të bëhet bashkia që do të ketë një program të veçantë për këtë, ndërkohë që janë dizenjuar fushat e terrenet sportive të standardeve më të larta të Europës.
