Mjeku neurolog i qendrës Spitalore Universitare “Nënë Tereza”, Drini Dobi po lufton për jetën në spital, pasi gjendja e tij shëndetësore u rëndua pas infektimit me koronavirus.
Miq, kolegë e të afërm kanë shkruar në rrjetet sociale lutjet e tyre që mjeku të gjejë forcat dhe të dalë fitimitar në këtë betejë me virusin e rrezikshëm.
Ndërsa nuk ka munguar as mesazhi i gazetares Sonila Meço.
Sipas Meços, mjeku i njohur ka nevojë urgjente për kurim të specializuar jashtë vendit.
“Në emër të familjes së mjekut të njohur neurolog Drini Dobi, mik i dashur prej shumë vitesh, ju bëj ne dije se gjendja e tij është rënduar, porse çdo lajm tjetër i dalë së fundmi në media mbi shuarjen e tij është i rremë.
Dr. Drini, që ka shpëtuar aq shumë jetë, që ka sakrifikuar në ditë të vështira si një ndër profesionistët më të mirë e dinjitarë sot ka nevojë për një kurim urgjent të specializuar jashtë vendit.
Kurajo Dr. Drin! Si lumi, që lë pas vorrbullat e shkuara e rrjedh vrrullshëm veç përpara paç forcën të rezistosh!”, shkruan Meço në postimin e saj.