Një familje në Kurtez të Kolonjës, që jetonte në kushte të vështira, ka marrë një shtëpi të re falë ndihmës së shqiptarëve përmes “Fundjavë Ndryshe”.
Arbër Hajdari tregon se dy vajzat, Andra dhe Denisa, ka humbur babain, por historia mori një kthesë emocionuese kur u zbulua se ai sa ishte gjallë, kishte kërkuar pikërisht atë shtëpi për ta blerë dhe për t’i siguruar familjes një jetë më të mirë.
Pa e ditur këtë histori, shtëpia u ble vite më vonë për vajzat e tij. “Një ëndërr e mbetur përgjysmë u kthye në një amanet të çuar në vend”, shkruan Hajdari.
Postimi i plotë
Nga errësira në dritë. U nisëm drejt Kurtezit, një fshat i largët i Kolonjës, rreth 7 orë larg Tiranës, për të takuar një familje që jetonte në vështirësi shumë të mëdha ekonomike dhe në kushte tepër të rënda.
Aty takuam Andrën dhe Denisën, dy vajza që, përveç vështirësive të jetës, mbajnë edhe dhimbjen e humbjes së babait të tyre. Pranë tyre është edhe gjyshja, nëna e tij, një nënë e vuajtur dhe zemërthyer nga humbja e të birit. Pikërisht aty, në shtëpinë e vjetër ku kjo familje kishte kaluar kaq shumë ditë të vështira, u dhamë lajmin se kishim blerë një shtëpi për ta.
Më pas u nisëm së bashku drejt Ersekës, për të parë shtëpinë e tyre të re. Por ajo që nuk dinim as ne, e bëri këtë histori shumë më të fortë. Pronari i shtëpisë na tregoi se babai i Andrës dhe Denisës, sa ishte gjallë, kishte ardhur pikërisht aty dhe kishte kërkuar ta blinte atë shtëpi me këste, me dëshirën për t’i siguruar familjes së tij një jetë më të mirë.
Nuk arriti dot… Ne, pa ditur asgjë nga kjo histori, kishim blerë pikërisht shtëpinë që ai kishte zgjedhur për familjen e tij. Kur e mësuam, emocionet ishin të jashtëzakonshme. Në atë moment kuptuam se nuk po dorëzonim vetëm çelësat e një shtëpie të re.
Po çonim në vend amanetin e një babai. Andra dhe Denisa sot hyjnë në shtëpinë që babai i tyre kishte ëndërruar për to, ndërsa një nënë sheh të realizohet dëshira që i biri nuk pati mundësi ta çonte deri në fund. Faleminderit nga zemra çdo shqiptari që ka dhuruar, që ka besuar dhe që është bërë pjesë e këtyre historive.
Mirënjohje e veçantë për dy shqiptarët që jetojnë jashtë vendit dhe që me kontributin e tyre ndihmuan që kjo familje të ketë sot një shtëpi të re. Edhe pse larg atdheut, zemrën e kishin pranë kësaj familjeje. Kjo është forca e shqiptarëve kur bëhemi bashkë.
Nga errësira në dritë, nga një ëndërr e mbetur përgjysmë, në një amanet të çuar në vend.
Shpërndajeni këtë video që kjo histori të shkojë sa më larg. Zoti i bekoftë të gjithë ata që ndihmuan dhe këtë familje në shtëpinë e tyre të re.