Lija e majmunit kohët e fundit ka ngjallur jo pak shqetësime për popullatën në mbarë botën. Mjeku Ilir Alimehmeti, thotë se kjo sëmundje është më e përhapur në zonën e Afrikës, për shkak të mënyrës së jetesës. Sa i takon Europës mjeku tha se deri tani nuk ka asnjë viktimë nga kjo sëmundje.
“Lija e majmunit shkaktohet nga një virus të cilin ne e njohim prej shumë kohësh. Pra e kemi zbuluar në vitin 1958. Virus endemik i zonën së Afrikës Qendrore dhe Afrikës Perëndimore, por zona të thella të Afrikës në përgjithësi. Atje gjendet më shpesh sepse ka rezervuarë natyrorë dhe kafshë të ndryshme të cilat ndodhen aty. Për shkak se popullata e atyre zonave ku janë ushqehen dhe janë në kontakt të ngushtë me këto kafshë, kanë mundësinë që ta marrin pikërisht prej tyre.
Mund të transmetohet në kontakt shumë të ngushtë nga njeriu tek njeriu dhe gjithmonë mbeten këto vatra që janë në Afrikë.
Ka pasur gjithmonë raste sporadike që kanë ardhur në Europë apo në shtete të tjera nga lija e majmunit, por vdekshmëria ka qenë në Afrikë gjithmonë. Kur vjen puna për Europën nuk është regjistruar asnjë rast”,-tha në ”TV Klan”.