Çmimet e naftës kanë shënuar rënie, ndërsa rriten pritshmëritë për një armëpushim të qëndrueshëm mes Shteteve të Bashkuara dhe Iranit nga një tjetër fazë bisedimesh që pritet të zhvillohet në Pakistan.
Megjithatë, pasiguria mbetet e lartë, pasi Ngushtica e Hormuzit vijon të jetë e bllokuar, duke mbajtur tregun nën tension.
Nafta e papërpunuar Brent u rrit me 4.7% të enjten, duke arritur pranë 98 dollarëve për fuçi, ndërsa West Texas Intermediate u tregtua afër 94 dollarëve për fuçi.
Presidenti i SHBA-së, Donald Trump, mbajti një qëndrim optimist për mundësinë e një armëpushimi afatgjatë, duke deklaruar se Irani kishte pranuar disa kushte të diskutuara prej kohësh, përfshirë hapjen e Ngushticës së Hormuzit. Megjithatë, Teherani nuk i ka konfirmuar publikisht këto pretendime.
Sipas zyrtarëve, disa liderë arabë të Gjirit dhe evropianë vlerësojnë se një marrëveshje paqeje mund të kërkojë deri në gjashtë muaj për t’u finalizuar, duke theksuar nevojën për zgjatjen e armëpushimit gjatë kësaj periudhe.
Tregu global i naftës është tronditur nga konflikti, i cili po i afrohet ditës së 50-të. Përplasjet kanë shkaktuar ndërprerje të mëdha në furnizim, pasi Irani ka kufizuar ndjeshëm transportin detar në Ngushticën e Hormuzit, një pikë kyçe për rreth një të pestën e flukseve botërore të naftës. Së fundmi, edhe Shtetet e Bashkuara kanë vendosur një bllokadë detare në zonë.