Zjarret që kanë përfshirë ditët e fundit zonat përreth kryeqytetit kanë nxjerrë në pah nevojën për mjete të specializuara për ndërhyrjen në terrene të vështira. Në përgjigje të kësaj situate, Bashkia e Tiranës ka hapur tenderin për blerjen e një automjeti zjarrfikës të përshtatshëm për të gjitha terrenet. Fondi limit i tenderit arrin në 29 milionë lekë, rreth 312 mijë euro, dhe financimi do të përballohet nga buxheti i Bashkisë së Tiranës për vitin 2026.
Automjeti që do të blihet duhet të jetë i ri, i papërdorur dhe i prodhuar në një nga vendet e Bashkimit Europian. Sipas specifikimeve të tenderit, mjeti duhet të jetë i kuq, i pajisur me fenelina dhe të ketë të paktën gjashtë vende. Një nga kërkesat kryesore lidhet me kapacitetin për përballimin e zjarreve në zona të vështira. Zjarrfikësja duhet të ketë një depozitë uji me kapacitet minimal 4 mijë litra, si dhe pompë me presion të lartë.
Lista e pajisjeve përfshin edhe mjete të posaçme shpëtimi, mes tyre një litar 30 metra, set të ndihmës së parë dhe pajisje shpëtimi të kombinuar elektro-hidraulike. Bashkia ka përcaktuar gjithashtu kushtet e garancisë: automjeti duhet të mbulohet për 3 vite ose 100 mijë kilometra, ndërsa në garanci përfshihen edhe shërbimet periodike.
Për kompanitë që do të garojnë, nuk mjafton vetëm oferta me çmimin më të ulët. Operatorët duhet të dëshmojnë eksperiencë në kontrata të ngjashme, qëndrueshmëri financiare përmes bilanceve të tre viteve të fundit dhe të kenë të paktën 50 punonjës. Kërkohet gjithashtu staf i specializuar inxhinierik, përfshirë inxhinierë mekanikë, xhenio dhe elektro-auto. Një tjetër kriter është disponimi i një servisi në pronësi ose me qira, me sipërfaqe jo më pak se 500 metra katrorë, brenda territorit të Bashkisë së Tiranës.