Ish-deputeti i PD-së, Genc Pollo, ka treguar për sinjalet që opozita mori nga takimi i sotëm me Presidentin e Parlamentit Europian, David Sassoli.
Sipas Pollos, delegacioni i PE-së doli shumë i kënaqur me takimin e opozitës, dhe me kanalet bashkëpunuese të opozitës si në rastin e miratimit të reformës zgjedhore, edhe pse për të “ajo që duhet të shpresojmë është zgjidhje e gjendjes se jashtëzakonshme në vend me forcat tona por është i mirëpritur çdo ndikim nga Europa”,-tha në ”A2cnn”.
Pikat kryesore të diskutuara për të ishin dy. ”Në radhë të parë, të mos jepet asnjë pretekst për kundërshtime të pabazuara për çeljen e negociatave, sepse kundërshtimet i ka vënë Bundestagu. Çështja e dytë është dalja nga kriza politike, reforma zgjedhore sapo të kryhet duhet të çojë në zgjedhje të parakohshme, mundësisht të dyfishta”.
Për Pollon, zgjidhja në këtë kuptim vjen nga aplikimi i të ashtuquajturës “formula maqedonase”, pra një qeveri kujdestare tre muaj para zgjedhjeve, “një kërkesë e thjeshtë që të mos ketë kontestime”.