Kryeministri Edi Rama deklaroi se ka një kepkuptim lidhur me Paketën e Maleve, duke theksuar se kjo nismë synon t’u japë mundësi trashëgimtarëve të pronave, për të zhvilluar ekonomikisht pasuritë e tyre.
Sipas Ramës bëhet fjalë për zonat ku toka nuk është ndarë sipas ligjit 7501.
Gjatë një bashkëbisedimi të hapur me banorët për “Paketën e Maleve”, Rama u bëri thirrje qytetarëve që të informohen për përmbajtjen e kësaj nisme dhe të mos bien pre, e deklaratave të pavërteta rreth saj.
“Për Paketën e Maleve ka një keqkuptim shumë të madh. Është shumë e rëndësishme që të gjithë ata që kanë një pronë të trashëguar dhe që janë jashtë perimetrit të legjislacionit ekzistues të ligjit 7501, ta dëgjojnë dhe ta kuptojnë deri në fund se për çfarë bëhet fjalë dhe të mos bien pre e gjithë marrëzive dhe ligësive që thuhen lidhur me këtë proces dhe me Paketën e Maleve.
Kjo nismë është ekzaktësisht e kundërta e të gjitha këtyre që thuhen. Ekzaktësisht e kundërta. Nuk është as për uzurpues, as për biznesmenë që nuk kanë lidhje dhe nuk kanë marrëveshje me ju, as për oligarkë, as për asgjë tjetër, përveçse për të vënë në lëvizje ekonominë e trashëgimtarëve të pronave në territore ku toka nuk është ndarë sipas ligjit 7501.
E keni ndarë tokën mes jush me kufijtë e vjetër dhe, përgjithësisht, jo gjithmonë, por përgjithësisht, nuk keni konflikte me njëri-tjetrin. Kjo është Paketa e Maleve. Nuk është asgjë tjetë. Ata që do të investojnë do ta marrin pronën me 1 euro, në perimetrin e përcaktuar. Dhe në momentin kur ndërtimi do të mbarojë, ata do të marrin hipotekën dhe prona do të bëhet e tyrja edhe ligjërisht”, tha Rama.