Kjo e enjte prodhoi ngjarje të shumta politike. Fillimisht ishte Partia Demokratike që shkaktoi disa herë kaos përgjatë ditës në sallën e seancën plenare dhe pasdite munguan gjatë votimit të projektligjeve. I vetëm nga opozita qëndroi kreu i Partisë ”Mundësia” Agron Shehaj me deputetin Erald Kaprin, të cilët debatuan edhe me kryeministrin Edi Rama, por nuk u dëgjuan. Ky i fundit erdhi me urgjencë nga Italia, përshkak të votës që u bë e nevojshme në Kuvend, në mungesë të deputetes Balluku dhe të Marjana Koçekut, ku edhe për të blinduar votimit, PS mori 3 votat e PSD-së për të votuar projektligjet.
Me rinisjen e seancës pleanre rreth orës 18:00, Agron Shehaj u përjashtua nga Kuvendi, edhe pse qëndroi në sallë duke lëshuar akuza për qeverinë. Ai nuk lejoi zhvillimin e procesit të votimit, ndërsa në sallë ndodhet edhe kryeministri Edi Rama, të cilit i kërkoi dorëheqjen. Në sallë mungonte opozita, duke lënë bosh karriget që fituan nga vota e popullit. ”Vazhdoni në oborr me Tik-Tok-un tuaj. Te lulishtja”, i tha Peleshi-Shehajt ndërsa i njoftoi përjashtimin. Në këtë seancë u miratua me 84 vota pro projektligji për dhënien e Amnistisë Penale. 466 persona do të lirohen menjëherë nga burgu, nga të cilët 11 janë gra dhe 1 i mitur. 869 persona do të përfitojnë ulje dënimi, mes tyre 8 gra dhe 1 i mitur.
Nga amnistia do të përfitojnë burrat që deri më 31 maj 2026 janë dënuar me vendim të formës së prerë deri në 3 vite burg ose u ka mbetur pa shlyer 3 vite, apo gratë që janë dënuar apo u ka mbetur pa shlyer 4 vite burg deri më 31 maj do të lirohen menjëherë. Opozita e cila nuk lejoi zhvillimin normal të seancës duke mbajtur të bllokuar për gati 4 orë foltoren, nuk është e pranishme në Kuvend.
Nga ana tjetër, po me 84 vota pro u votua projektligji për ndryshimet në Kodin Rrugor. Amendamentet për këtë projektligj ishin paraqitur nga deputetët e PS-së, Ulsi Manja dhe Erjon Braçe. Këto ndryshime vijnë pas aksidentit të rëndë në Durrës, ku drejtuesi i mjetit Nikoll Radaçi 57 vjeç, përplasi tre fëmijë të mitur në trotuar, ku dy prej tyre humbën jetën dhe tjetri mori lëndime të rënda.
Zhvendosja e protestuesve pranë godinës së Kuvendit pas 19-të ditësh, u shoqërua me momente tensioni dhe përplasje verbale. Protestuesit u përballën me deputetin e PS-së, Ardit Bido. Ky i fundit u përpoq fillimisht t’i sqaronte protestuesit, dhe më pas u desh ndërhyrja e efektive për ta larguar nga zona, duke shmangur përshkallëzimin e situatës. Vendimi i PD-së për të mos votuar ligjet në Kuvend, nuk është pranuar nga qytetarët protestues, pasi kaluan nga selia blu me thirrje ”Opozitë e shitur, Berisha në burg”. Këto thirrje nuk janë pranuar nga një person që u pa brenda selisë blu dhe doli më pas në ofendime ndaj qytetarëve. Për pak minuta u krijua një situatë tensioni, por më pas protestuesit nisën marshimin drejt Kryeministrisë. protesta vijon me lajmet përballë Kryeministrisë, dhe më pas pritet edhe nisja e marshimit në rrugët e Tiranës. /Redjon Shtylla-Koha Jonë/
Lexoni edhe:
Berisha mungoi në votimet për rendin e ditës, Salianji: Akt tradhtie, po bën teatër politik
Protesta zhvendoset tek Kuvendi, deputetët e PS kalojnë pranë tyre. Qytetarët: Jeni të shitur
Amnistia Penale merr 84 vota, ministri Lamallari: Një lajm i shumëpritur për familjet shqiptare