Një ngjarje tragjike tronditi qytetin e Gjirokastrës më 10 shkurt 2025, ku një 17-vjeçare dyshohet se ka kryer vetëflijim për shkak të bullizimit që përjetonte. Ajo kishte shkruar një letër në anglisht ku shprehte dhimbjen dhe ndjenjën e izolimit.
Ngjarja ka shkaktuar reagime të forta në komunitetin lokal, ndërsa Prokuroria e Gjirokastrës ka nisur hetimet. Si provë kyçe, prokuroria po shqyrton një letër të gjetur në celularin e të ndjerës, ndërsa dyshohet se ajo mund të ketë mbajtur edhe një ditar. Në letrën e gjetur shkruhet:
”O Zot, pse po vuaj kështu? Unë jam kjo që jam dhe dua që miqtë dhe shokët të më respektojnë. Por ata tallen me mua. Ndihem kaq e vetmuar dhe e mbytur në vetminë time. Nuk më vjen turp për veshjen time, kjo është mundësia e prindërve të mi, të cilët kujdesen për mua me dashuri. Por pse duhet të ndihem kaq e veçuar? Kujt t’i drejtohem? Kujt t’ia hap zemrën? Tek askush nuk kam besim, madje as tek psikologia. Pse duhet të vuaj? A është kjo jeta?”.
I ftuar në studion e “People”, psikiatri Neli Demi theksoi rëndësinë e ndërhyrjes në raste të tilla për të parandaluar tragjedi të ngjashme. “Absolutisht, mund të parandalohet. Në faza të ndryshme të problematikës ka mundësi për ndërhyrje. Nuk dihet saktësisht sa vetëvrasje mund të parandalohen, por është e qartë që vendimi për një akt të tillë vjen si rezultat i një procesi të gjatë emocional. Vetëvrasja mund të jetë një akt impulsiv, por rrënjët e saj shtrihen shumë më herët”, tha psikiatri Demi.