Gjykata e Posaçme ka shpallur moskompetencën, duke ia kaluar Gjykatës së Tiranës, gjykimin e sekuestros së pasurive të ish-prokurorit të Përgjithshëm, Adriatik Llalla. Vepra penale që akuzohet ish-prokurori i Përgjithshëm nuk është konpetencë e kësaj gjykate dhe në bazë të ligjit Antimafia këtë gjykim duhet ta bëjë Gjykata e Tiranës.
Hetimi u regjistrua nga Prokuroria e Durrësit më 15 mars 2018 me akuzat e fshehjes së pasurisë, shpërdorimit të detyrës dhe pastrimit të parave. Ai u hetua edhe për veprën penale të “mosdeklarimit të shumave monetare në kufi”.
Dosja u dërgua në Prokurorinë e Krimeve të Rënda dhe në korrik 2018, kjo gjykate vendosi sekuestron e pronave të ish-prokurorit të Përgjithshëm. Ish-prokurorit iu sekuestrua një apartament 67 metra katrorë në Durrës dhe katër parcela toke me sipërfaqe të përgjithshme prej rreth 22 mijë metrash katrorë në periferi të Tiranës.
