Ditën e sotme kanë hyrë në fuqi kufizimet e reja për importin e mishit nga Brazili, pas ndryshimeve të miratuara nga Bashkimi Europian dhe të reflektuara edhe nga Autoriteti Kombëtar i Ushqimit në Shqipëri.
Brazili u hoq nga lista e vendeve të autorizuara për disa kategori produktesh me origjinë shtazore, pasi Komisioni Europian deklaroi se nuk kishte marrë garancitë e nevojshme për zbatimin e kërkesave që lidhen me përdorimin e disa produkteve medicinale antimikrobike.
Por sa e ekspozuar është Shqipëria ndaj këtij kufizimi?
Të dhënat e INSTAT tregojnë se gjatë periudhës Janar-Korrik 2026 Shqipëria importoi gjithsej rreth 28.1 mijë tonë mish dhe të brendshme të ngrënshme, ndërsa 9.2 mijë tonë erdhën nga Brazili.
Kjo do të thotë se Brazili zinte 32.8% të sasisë totale të importuar, ose afërsisht një në çdo tre kilogramë.
Pesha e Brazilit në importet shqiptare është rritur ndjeshëm gjatë viteve të fundit. Në vitin 2021 ai siguronte 16.2% të importeve, në 2022 pesha u rrit në 20.8%, në 2023 në 26.6%, ndërsa në 2025 arriti në 28.8%. Vitin e kaluar Shqipëria importoi rreth 13.2 mijë tonë mish dhe të brendshme nga Brazili, nga 45.7 mijë tonë importe gjithsej.
Pra, kufizimi hyn në fuqi në një moment kur varësia e importeve shqiptare nga Brazili është rritur dhe gjatë këtij viti ka arritur në afërsisht një të tretën e totalit.
Kjo mund t’i detyrojë importuesit të orientohen drejt tregjeve të tjera. Nëse furnizimet alternative do të kenë kosto më të larta, mund të krijohet presion mbi çmimet, por në këtë fazë është ende herët për të thënë nëse masa do të përkthehet drejtpërdrejt në shtrenjtim për konsumatorët.
Duhet theksuar se të dhënat e INSTAT përfshijnë të gjithë kategorinë “mish dhe të brendshme të ngrënshme”, ndërsa kufizimet e reja prekin konkretisht mishin e gjedhit dhe të shpendëve.
Scan TV