Katër fëmijët dhe Floresha Rasha, të kthyer nga kampi i Al-Hawl, tashmë janë larguar nga Shtëpia e Pushimit në Durrës. Mësohet se Floresha Rasha është vendosur në një banesë të siguruar nga shteti bashkë me fëmijët, kurse Endri Dumani është marrë nga e ëma pas procesit të rehabilitimit.
”Më vjen shumë mirë që kemi mbyllur fazën e parë të një operacioni të ngatërruar, sidoqoftë të suksesshëm. Ajo që është edhe më e rëndësishme është që tanimë kemi bazën për të vazhduar me fazën e dytë. Fëmijët e tjerë janë identifikuar, janë bërë një pjesë e mirë e kontakteve dhe intervistave dhe besoj që më herët se vonë, do të kthejmë edhe pjesën tjetër”, shprehej Rama pas kthimit nga Siria të këtyre 5 personave në muajin tetor të vitit të kaluar.