Aeroporti Ndërkombëtar i Tiranës ka regjistruar tjetër muaj rekord, duke konfirmuar trendin e fortë të rritjes së trafikut ajror në Shqipëri. Sipas të dhënave zyrtare, gjatë muajit Prill janë përpunuar mbi 1,1 milionë pasagjerë, ose 25% më shumë krahasuar me të njëjtën periudhë të vitit të kaluar.
Rritja është reflektuar edhe në numrin e fluturimeve, të cilat arritën në 6,724 gjatë muajit prill, me një zgjerim prej 24% në baza vjetore. Në katër muajt e parë të vitit, aeroporti ka përpunuar gjithsej 3.29 milionë pasagjerë, ndërsa lëvizjet e avionëve kanë arritur në 19,400.
Londra vijon të jetë destinacioni më i kërkuar për udhëtarët nga dhe drejt Shqipërisë, me mbi 102 mijë pasagjerë vetëm gjatë Prillit. Pas saj, renditen Bergamo, Roma, Brukseli dhe Bolonja, ndërsa trafik të konsiderueshëm kanë regjistruar edhe Treviso, Pisa, Stambolli dhe Milano.
Njëkohësisht, disa tregje të reja kanë shfaqur ritme të jashtëzakonshme rritjeje. Napoli kryeson me një zgjerim prej 329%, i ndjekur nga Torino, Praga, Bukureshti dhe Trieste, duke treguar diversifikimin e vazhdueshëm të destinacioneve ajrore.
Gjatë muajit Prill, TIA operoi me 23 kompani ajrore dhe lidhi Shqipërinë me 87 destinacione në 28 vende. Kjo rritje, mbështetet edhe nga investimet e vazhdueshme në zgjerimin e terminalit, teknologji dhe kapacitete operacionale, me synimin për ta konsoliduar aeroportin si një nga qendrat më të rëndësishme të transportit ajror në Ballkanin Perëndimor.
Alida Lula/ Scan TV