Një turist portugez rreth 20 vjeç humbi jetën pas një konflikti në ambientet e resortit ”Principotes” në Ksamil. Luis Miguel Varela Mendes kishte mbërritur në Ksamil së bashku me një grup turistësh portugezë. Sipas të dhënave të reja të hetimit, konflikti dyshohet se ka nisur rreth orës 02:30, brenda lokalit “La Guerra”, pjesë e resortit.
20-vjeçari dyshohet se është goditur disa herë me mjet prerës në shpinë dhe në kraharor, plagë që i kanë shkaktuar vdekjen. Pas ngjarjes, trupi i tij është nxjerrë jashtë ambienteve të beach bar-it dhe është lënë në zonën e plazhit, ku dyshohet se ka qëndruar për afro tre orë, deri në momentin kur është zbuluar dhe në vendngjarje ka mbërritur policia. Në kuadër të hetimeve, policia e Sarandës ka shoqëruar 42 persona, të cilët po merren në pyetje për të zbardhur dinamikën e konfliktit dhe për të përcaktuar përgjegjësinë e secilit prej personave që ndodheshin në lokal.
Është ndaluar edhe 24-vjeçari Moisid Matushaj, banues në Gjirokastër dhe Ndihmës Specialist i Hetimit të Krimit në Drejtorinë Vendore të Kufirit dhe Migracionit Gjirokastër. Ai dyshohet se ka ndihmuar Sokrat Vatën, autorin e dyshuar, të largohej pas vrasjes.
Të dy punonin si bodyguard në ambientet e “Principotes”. Hetuesit po verifikojnë gjithashtu rolin e një çifti turk, i cili dyshohet se ka drejtuar automjetin me të cilin Vata është larguar nga zona. Sipas dyshimeve të hetimit, Vata kishte punuar më herët si bodyguard i shtetasit turk.
Administratori i “Principotes” është shpallur në kërkim. Sipas të dhënave paraprake, ai ndodhej në vendin e ngjarjes, por më pas është larguar në drejtim të Tiranës. Policia dhe grupi hetimor po vijojnë punën për të rindërtuar minutë pas minute ngjarjen, nga momenti i konfliktit brenda lokalit, te vrasja dhe nxjerrja e trupit jashtë, deri te largimi i personave të dyshuar nga vendi i ngjarjes. Pranë hetimeve priten edhe arrestime të tjera.