Ministri i Shtetit për Marrëdhëniet me Parlamentin dhe drejtuesi i PS-së për Diasporën, Taulant Balla ka takuar në Toskanë futbollistin Ardian Ismajli, pak minuta përpara takimit me bashkatdhetarët shqiptarë në “Palazzo Dei Congressi” në këtë qytet të Italisë.
“Ndalesa e parë në Toskanë nuk mund të ishte përveçse me djalin më të mirë të Podujevës dhe të Kosovës. Sigurisht, është një krenari e madhe për ne që ja kemi besuar mbrojtjen një kosovari, siç e kanë zakon kosovarët, “nuk lenë gjë me kalu”.
Pak më vonë do jemi në takim me shumë vëllezër e motra shqiptarë, por e vërteta është që Ismajli po shkëlqen në Seria A si qendërmbrojtësi më i mirë dhe tani ka hyrë në syrin dhe në vëzhgimin e klubeve më të mëdha të Italisë. Ti je një nga ambasadorët më të mirë të Shqipërisë që na bën krenarë”, tha Balla.
Deputeti socialist dhe futbollisti Ismajli shkëmbyen edhe batutat e rastit për ndeshjet e Kombëtares në kualifikueset e Botërorit 2026. “Fillojmë në 21 mars me Anglinë, merakun e kemi me 7 qershor e me radhë”, tha Balla.