Deklarimet e të penduarit, Nuredin Dumani për vrasjen e kryekomisarit Dritan Lamaj 12 vite më parë, kanë ngjallur reagimin e biznesmenit Arben Frroku. Ku i fundit i dënuar përjetë nga drejtësia si autor i ngjarjes, përmes një shkrese të dërguar në SPAK, kërkon marrjen në pyetje të të penduarit Nuredin Dumani.
Sipas ”A2cnn”, në shkresën e firmosur nga përfaqësuesi i tij ligjor, Tonin Prendi, Frroku pretendon se informacionet që mund të përftohen nga dëshmitë e tyre mund të ndryshojnë totalisht rrjedhën e ngjarjes së vrasjes së të ndjerit Dritan Lamaj.
Duke përmendur përballjen me drejtësinë shqiptare, por edhe pretendimet e tij për pafajësi deri në Strasburg, biznesmeni nënvizon në shkresën dërguar SPAK dhe titullarit Altin Dumani, se gjithmonë i ka kundërshtuar akuzat e rënda të ngritura ndaj tij, se nuk ka asnjë lidhje me vrasjen e kryekomisarit dhe se, sipas tij, marrja e shpjegimeve nga Dumani, Hoxhaj e Qoli do të hidhte dritë mbi pafajësinë e tij.
