Një ditë pas ekzekutimit të tregtarit të Makinave në Lushnje, Policia ende nuk ka persona të dyshuar të vënë në pranga. Grupi hetimor mësohet se ka marrë në pyetje familjarët e Besnik Hidës, por tregohet i rezervuar në detaje. Dyshimi kryesor sipas burimeve mbetet pista e vrasjes hakmarrjen mes bandave të Lushnjes.
Ekzekutorët i Besnik Hidës, biznesmenit të makinave të përdorura, i vrarë në Lushnjë të martën mbeten në arrati.
Edhe pse tregohet shumë e rezervuar, policia e Lushnjës sipas burimeve ende nuk ka një person në pranga në cilësinë e të dyshuarit për krimin.
Burimet thonë se grupi hetimor ka marrë dëshmitë e familjarëve të viktimës, të cilët janë pyetur për konflikte të mundshme apo nësë 40 vjeçari ka marrë kërcënime.
Por në këtë pikë, grupi hetimor tregohet shumë i rezervuar mbi pistat që mund ta kenë drejtuar hetimin dëshmitë e tyre.
Hida u vra me breshëri automatiku në katin e dytë të një lokali, ndërsa autori i maskuar më pas u largua nga vendngjarja me një makinë që u gjet e djegur në periferi të Lushnjës.
Grupi hetimor nga ana tjetër po pret përgjigjet e ekspertizës të tre armëve të gjetura brenda makinës dhe gjurmëve të tjera që mund të jenë gjetur aty.
Fakti se makina e përdorur për atentatin ishte grabitur në Tiranë dhe historitë e së shkuarës, çojnë policinë në dyshimin se vrasja e 40 vjeçarit mund ketë lidhje me hakmarrjen e bandave të Lushnjës.
Kjo tezë përforcohet nga fakti se viktima Besnik Hida, ishte daja i Zamir Latifit i vrarë rreth dy vjet më parë në atë që njihet masakra e Lushnjës, ku humbi jetën edhe Jurgen Hoxha, ndërsa u plagosën Marius Xhepexhiu dhe një kalimtar.
/Ora News