Presidenti ukrainas, Volodymy Zelensky thotë se anëtarësimi i Ukrainës në BE, është një nga garancitë kryesore të sigurisë, jo vetëm për vendin e tij, por edhe për të gjithë kontinentin.
Përmes një postimi në rrjetet sociale, Zelensky, teksa u shpreh se ka pasur një bisedë telefonike me kancelarin austriak, deklaroi se pranimi i Ukrainës në BE duhet të ketë një afat konkret, vitin 2027.
“Gjatë një bisede me Kancelarin Federal të Austrisë, diskutuam situatën energjetike në Ukrainë. Rusia godet infrastrukturën energjetike çdo ditë duke i lënë ukrainasit pa energji elektrike dhe ngrohje, dhe është shumë e rëndësishme që partnerët t’i përgjigjen kësaj. Kjo është arsyeja pse e vlerësojmë shumë vendimin e Austrisë javën e kaluar për të ndarë fonde për të mbështetur sektorin tonë të energjisë.
Diskutuam gjithashtu mënyra të tjera për të mbështetur sistemin tonë të energjisë. Gjithashtu e informova Kancelarin për takimet trepalëshe të delegacioneve ukrainase, amerikane dhe ruse që u zhvilluan në Emiratet e Bashkuara Arabe javën e kaluar. Palët diskutuan kryesisht çështje ushtarake, por folën edhe për garancitë e sigurisë.Pranimi i Ukrainës në Bashkimin Evropian është një nga garancitë kryesore të sigurisë jo vetëm për ne, por edhe për të gjithë Evropën.
Në fund të fundit, forca kolektive e Evropës është e mundur, në veçanti, falë kontributeve të sigurisë, teknologjisë dhe ekonomisë së Ukrainës. Kjo është arsyeja pse po flasim për një datë konkrete, 2027 dhe mbështetemi te partnerët për qëndrimin tonë. E ftova Kancelarin të vizitojë Ukrainën në mënyrë që të mund të vazhdojmë dialogun tonë personalisht. Faleminderit!”, shkruan Zelensky.
Një procedurë e përshpejtuar, sikurse kërkon presidenti ukrainas, nuk është e parashikuar në BE, por në sfondin e situatës gjeostrategjike në Europë, kjo nuk mund të përjashtohet më.
Me Ukrainën, Gjeorgjinë dhe Moldavinë, të tria ish-republikat sovjetike, BE-ja ka vendosur marrëveshje asocijimi, që synojnë të mundësojnë afrimin shoqëror e politik në BE. Deri tani vendet e BE-së e kanë shmangur një premtim, që këto përpjekje dikur do të kurorëzohen në anëtarësim.