Mali i Tërbunit në Pukë është përfshirë nga zjarri gjatë orëve të mesditës, ndërsa flakët, të favorizuara nga erërat dhe terreni i vështirë malor, janë përhapur në një sipërfaqe të konsiderueshme pyjore.
Situata paraqitet e vështirë për ndërhyrje, pasi terreni malor pengon depërtimin e mjeteve zjarrfikëse në zonat e prekura nga zjarri.
Në terren janë angazhuar strukturat e bashkisë Pukë, shërbimi zjarrfikës, strukturat e shërbimit pyjor dhe punonjës të shërbimeve, të cilët po punojnë për kufizimin dhe vënien nën kontroll të vatrave.
Në kushtet e situatës së krijuar, bashkia Pukë u ka bërë apel banorëve, të rinjve dhe qytetarëve që kanë mundësi të kontribuojnë, të bashkohen në përpjekjet për mbrojtjen e pyjeve dhe pasurisë natyrore.
Bashkia thekson se çdo ndërhyrje vullnetare duhet të bëhet vetëm në koordinim me strukturat profesionale dhe në përputhje me udhëzimet e tyre, për të shmangur rrezikun për jetën dhe sigurinë.
“Tërbuni është pasuri e Pukës, e jona të gjithëve”, thuhet në apelin e bashkisë, e cila i fton qytetarët të kontribuojnë me përgjegjësi dhe solidaritet në përballimin e situatës.
Strukturat në terren vijojnë punën për izolimin e vatrave dhe mbrojtjen e sipërfaqeve pyjore, ndërsa situata mbetet nën monitorim.