Pas disa ditësh përballje me vatrat e zjarrit, Bashkia Fier ka nisur procesin e evidentimit dhe vlerësimit të dëmeve të shkaktuara nga flakët në disa zona të territorit të bashkisë.
Për të përcaktuar përmasat e dëmeve, Bashkia Fier ka ngritur dy grupe pune.
Një grup do të merret me evidentimin e dëmeve në kulturat bujqësore, pemët frutore dhe ullishtet në Njësitë Administrative Frakull, Levan dhe Qendër.
Ndërkohë, grupi i dytë do të evidentojë dhe vlerësojë dëmet në banesa, stalla, pajisje dhe makineri. Sipas Bashkisë, puna për vlerësimin e dëmeve në banesa ka nisur që sot.
Procesi do të zhvillohet në bashkëpunim me kryetarët e njësive administrative dhe kryepleqtë e fshatrave, me qëllim që evidentimi dhe vlerësimi i dëmeve të përfundojë sa më shpejt dhe në mënyrë të plotë.
Zjarri, i cili përfshiu një sipërfaqe të gjerë, nisi në zonën e Fermë Çlirimit dhe, i favorizuar nga era e fortë, u përhap me shpejtësi drejt Radostinës dhe fshatrave përreth. Flakët prekën disa zona të njësive administrative, duke shkaktuar dëme të konsiderueshme në sipërfaqe bujqësore dhe prona.
Një prej vatrave më problematike u shfaq në masivin me pisha pranë Frakullit, ndërsa zjarret prekën edhe zona në Peshtan të Fierit dhe Çërrilë të Mallakastrës.
Pas shuarjes së flakëve, panorama në zonat e prekura është e rëndë. Toka të nxira, ullishte të shkrumbuara, pemë frutore të djegura dhe prona të dëmtuara janë pasojat që kanë mbetur pas zjarrit.
Në Levan të Fierit, flakët kanë shkaktuar dëme në ullishte dhe kultura bujqësore, ndërsa janë dëmtuar edhe dy banesa. Banorët tashmë përballen me pasojat e zjarrit dhe humbjet e shkaktuara në tokat e tyre.
/rtsh.al/