Si pjesë e marrëveshjes në negociata, Uashingtoni ka rënë dakord të zhbllokojë 12 miliardë dollarë fonde të ngrira për Iranin dhe të pezullojë përkohësisht sanksionet ndaj naftës nga republika islamike, raportuan të martën mediat shtetërore iraniane. Megjithatë, zëvendëspresidenti amerikan JD Vance deklaroi të hënën se asetet iraniane nuk ishin zhbllokuar ende dhe se, nëse do të ndodhte, ato nuk do të financonin terrorizmin, por mund të përdoren për të blerë mallra amerikane si soja.
Vance theksoi se dhëndri dhe këshilltari i lartë i Presidentit amerikan Donald Trump, Jared Kushner, së bashku me Katarin, një bashkë-ndërmjetës në bisedime, kishin gjetur “një zgjidhje shumë interesante” për të siguruar që këto fonde të mos keqpërdoren. Ai shtoi se “nëse ka asete iraniane të ngrira që zhbllokohen, atëherë ne kemi miratim mbi atë proces; Katari ka miratim mbi atë proces.”
Këtë pretendim e hodhi poshtë prerë Ali Bahreini, ambasadori iranian në Kombet e Bashkuara në Gjenevë. “Irani është i vetmi vend që do të vendosë se çfarë të bëjë me asetet e tij, të cilat do të zhbllokohen,” u tha ai gazetarëve në Gjenevë. Bahreini refuzoi çdo pretendim se ndonjë vend tjetër do të kishte ndonjë rol apo ndikim në këto vendime apo procese.
Bahreini kishte qenë me ekipin diplomatik iranian në kompleksin Burgenstock në Zvicrën qendrore, ku u zhvilluan bisedimet e ndërmjetësuara midis Shteteve të Bashkuara dhe Teheranit të dielën. Çështja e zhbllokimit të aseteve është pjesë e një memorandumi mirëkuptimi të nënshkruar javën e kaluar nga Teherani dhe Uashingtoni, duke hedhur bazat për 60 ditë negociatash për të zgjidhur çështje më të gjera, duke përfshirë programin bërthamor të Iranit dhe lehtësimin e sanksioneve.
Ambasadori iranian theksoi se asetet e bllokuara të Iranit do të zhbllokoheshin “shumë shpejt”. Ai pranoi se “ka disa rregullime teknike që duhet të bëhen nga Shtetet e Bashkuara dhe nga Katari, sepse asetet janë ngrirë nga Shtetet e Bashkuara, dhe të paktën disa pjesë të këtyre aseteve janë në Katar”. Megjithatë, Bahreini theksoi se roli i tyre është i kufizuar vetëm në këto aspekte teknike të zhbllokimit të aseteve dhe se Irani nuk do t’i lejojë ata të kenë ndikim të mëtejshëm në proceset e tjera, pasi “kjo është diçka që Irani dhe vetëm Irani do ta vendosë.”