Mesazhi i Donald Trump drejtuar aleatëve evropianë, se Shtetet e Bashkuara nuk kanë ndërmend të tërhiqen nga çështja e Groenlandës, u përforcua nga Sekretari amerikan i Thesarit, Scott Bessent. Ky i fundit argumentoi se Evropa është “shumë e dobët” për të garantuar sigurinë e saj.
Duke folur për NBC News, Bessent minimizoi kërcënimet e Bashkimit Evropian për anulimin e marrëveshjes tregtare të arritur vitin e kaluar me administratën Trump. Ai theksoi se presidenti amerikan po përdor ndikimin strategjik si një levë për të realizuar objektivat e tij.
“Para së gjithash, marrëveshja tregtare nuk është finalizuar dhe një veprim emergjent mund të jetë krejtësisht i ndryshëm nga një marrëveshje tjetër tregtare”, tha ai të dielën, duke shtuar se Trump po “përdor fuqitë emergjente për ta bërë këtë”.
Të shtunën, Trump njoftoi vendosjen e tarifave prej 10% për produktet nga tetë vende evropiane, duke nisur nga 1 shkurti, me një rritje të parashikuar në 25% në qershor, nëse nuk arrihet një marrëveshje për “blerjen e Groenlandës”.
Ky zhvillim shkaktoi reagime të forta në Evropë. Presidenti francez Emmanuel Macron e cilësoi masën “të papranueshme” dhe deklaroi se do të kërkojë aktivizimin e mekanizmit më të fortë hakmarrës të Bashkimit Evropian.
Bessent paraqiti gjithashtu një argument më të gjerë për pretendimin amerikan ndaj Groenlandës, duke përmendur konkurrencën gjeopolitike në rritje në Arktik, planet e Trump për vendosjen e mburojës raketore të quajtur “Kupola e Artë”, si edhe varësinë e mëparshme të Evropës nga Rusia, e cila sipas tij “financoi operacionet ruse kundër Ukrainës”.
I pyetur nëse qëndrimi i Trump ndaj Evropës është thjesht një taktikë negociuese, Sekretari i Thesarit la të kuptohet se presidenti nuk ka ndërmend të ndryshojë kursin.
“Evropianët rrezatojnë dobësi, Shtetet e Bashkuara rrezatojnë forcë”, deklaroi ai.
“Presidenti beson se siguria e shtuar nuk mund të ekzistojë pa qenë Groenlanda pjesë e Shteteve të Bashkuara”, shtoi Bessent.
Duke iu përgjigjur shqetësimeve të disa udhëheqësve evropianë se një veprim amerikan për blerjen e Groenlandës mund të çojë në shpërbërjen e NATO-s, pas më shumë se 70 vjetësh, Bessent e cilësoi këtë dilemë si “të rreme”.
“Udhëheqësit evropianë do ta pranojnë këtë dhe do ta kuptojnë se kanë nevojë për ombrellën e sigurisë së Shteteve të Bashkuara”, përfundoi ai.