Guvernatorët republikanë në disa shtete amerikane kanë vënë në gatishmëri trupat e Gardës Kombëtare, për t’u përgatitur ndaj protestave mbarëkombëtare të organizuara kundër Donald Trump dhe politikave të tij.
Protestat, të njohura me emrin “No Kings” (“Jo Mbretër”), pritet të zhvillohen në mbi 2,500 qytete në të gjithë Shtetet e Bashkuara, me pjesëmarrje masive. Organizatorët deklarojnë se qëllimi i tyre është kundërshtimi i autoritarizmit dhe korrupsionit në administratën Trump.
“Presidenti mendon se sundimi i tij është absolut, por në Amerikë ne nuk kemi mbretër dhe nuk do të tërhiqemi përballë kaosit, korrupsionit dhe mizorisë”, thuhet në deklaratën zyrtare të lëvizjes “No Kings”.
Ndërkohë, aleatët e Trump kanë akuzuar protestuesit se kanë lidhje me lëvizjen Antifa, ndërsa disa guvernatorë republikanë kanë marrë masa sigurie për të shmangur çdo përshkallëzim të mundshëm.
Guvernatori i Teksasit, Greg Abbott, ka aktivizuar Gardën Kombëtare përpara një proteste të madhe të planifikuar në Austin, duke e justifikuar këtë vendim me kërcënime të mundshme për dhunë.
Guvernatori i Virxhinias, Glenn Youngkin, ka urdhëruar gjithashtu aktivizimin e njësive të Gardës Kombëtare në shtetin e tij.
Nga ana tjetër, demokratët e kanë kritikuar ashpër këtë qasje, duke e cilësuar si një reagim të tepruar ndaj protestave paqësore.
“Dërgimi i ushtarëve të armatosur për të shtypur protesta paqësore është ajo që bëjnë mbretërit dhe diktatorët, dhe Greg Abbott sapo e vërtetoi se është një prej tyre”, – deklaroi ligjvënësi demokrat Gene Wu.
Sipas BBC, protesta e fundit “No Kings”, e mbajtur në qershor, mblodhi mbi pesë milionë pjesëmarrës në të gjithë vendin. Edhe këtë herë, pritet që manifestimet të nisin në New York City dhe të përhapen në qytete të tjera gjatë ditës.-