Pak pasi kishin mbërritur në ishullin Lesbos të Greqisë, një grup emigrantësh afganë akuzojnë se i’u ndërprenë shpresat për një jetë të re në Europë. Ata shprehen se u rrethuan nga autoritetet greke, të cilët i shtynë sërish në gomone dhe i braktisën në det.
Turqia e cila po strehon rreth 4 milionë refugjatë, ka akuzuar Greqinë se po kthen emigrantët ndërsa i ka drejtuar akuza dhe Bashkimit Europian se “po bën një sy qorr” në atë që i ka cilësuar si shkelje flagrante e të drejtave të njeriut. Rojet kufitare turke thonë se vetëm këtë muaj kanë shpëtuar mbi 300 emigrantë “që janë kthyer nga autoritetet greke drejt ujërave turke”.
Greqia i ka mohuar akuzat e Ankarasë dhe thotë se vendi fqinj po i përdor emigrantët për ta sulmuar. Në mars, Turqia kërcënoi se do të hapte dyert me BE për të lejuar kalimin e emigrantëve në Europë. Në atë çka u duk si një fushatë e mirë organizuar e qeverisë, mijëra u drejtuan nga Greqia duke përshkallëzuar në skena kaosi dhe dhune.
Greqia mbylli kufijtë dhe pezulloi kërkesat për azil për një muaj. Greqia dhe Turqia kanë mosmarrëveshje prej dekadash dhe çështja e azil kërkuesve duket se është gjendur në mesin e këtij konflikti gjeopolitik.