Fillimi i vitit 2024 nuk po shkon mirë për Tesla, kompania në të cilën Elon Musk është shefi ekzekutiv (CEO). Ai që ishte dominuesi i madh i tregut të makinave elektrike, për herë të parë ka shitur më pak automjete të këtij lloji se në të njëjtën periudhë të një viti më parë. Dhe, përballë një të ardhmeje gjithnjë e më elektrike, më shumë konkurrentë po shfaqen për markën amerikane.
Këto shifra të këqija e shtynë CEO-n të merrte një vendim drastik, me shkarkimin e më shumë se 14 mijë punëtorëve, që përfaqëson afërsisht 10% të totalit të punonjësve të kompanisë. Për më tepër, po diskutohet për zhvillimin e makinave elektrike të lira.
Ky shkarkim masiv u kritikua shumë, pasi u realizua përmes një letre. Tashmë është bërë e ditur përmbajtja e plotë e letrës, e cila bie në sy për ftohtësinë me të cilën kompania i drejtohet ish-punonjësve të saj.
“Emailet e heqjes nga puna të Teslës janë jashtëzakonisht të ftohta. As chatbot-et e inteligjencës artificiale nuk janë kaq të ftohta,” vëren “The Verge” pas publikimit të letrës, të bërë publike nga një prej punonjësve të pushuar në kushte anonimiteti.
Letra fillon duke thënë se është kryer një “shqyrtim i kujdesshëm i kufizimeve dhe rolit tuaj të përhershëm të punës”. Pas kësaj, dhe pa thënë kurrë fjalën “shkarkim”, në letër shkruhet: “Është vlerësuar se nuk ka asnjë përshtatje të arsyeshme që do t’ju lejojë të vazhdoni të kryeni funksionet thelbësore të pozicionit tuaj në rolin tuaj. Hapi tjetër është kërkimi alternativ i punësimit. Një proces që konsiston në rishikimin e grupit të punësimit, të brendshëm dhe të jashtëm të Teslas për të kërkuar pozicione të mundshme”.
Por, ajo që vijon është një tjetër “bombë”: “Ju informojmë se nuk kemi identifikuar asnjë vend të lirë pune në kompani për të cilin ju jeni të kualifikuar. Meqenëse nuk kemi identifikuar një pozicion alternativ të disponueshëm, ne do të fillojmë të përpunojmë largimin tuaj Tesla, duke filluar nga 3 maj 2024”.