Kancelari gjerman, Friedrich Merz, i bëri një thirrje të fuqishme Rusisë për të ndalur luftën kundër Ukrainës, duke e cilësuar agresionin si të paligjshëm dhe me pasoja katastrofale për njerëzit dhe ekonominë globale.
“Rusia ka nisur një luftë të paligjshme. Tani ajo duhet t’i japë fund këtij agresioni, i cili ka sjellë vuajtje të tmerrshme njerëzore në Evropë”, deklaroi Merz gjatë seancës së parë të samitit të G20-s në Afrikën e Jugut, sipas burimeve qeveritare. Ai shtoi se Rusia ka përgjegjësi të madhe për të ndaluar ndikimin e drejtpërdrejtë të luftës në ekonominë globale, por theksoi gjithashtu se edhe të gjithë anëtarët e tjerë të G20 duhet të përmbushin përgjegjësitë e tyre, jo vetëm për interes ekonomik.
“Ne ua kemi borxh këtë të gjithë botës – kjo është sfida më e madhe për G20,” u citua Merz duke iu drejtuar homologëve të tij.
Një nga temat më të rëndësishme të samitit është edhe plani i ri i paqes prej 28 pikash i propozuar nga Shtetet e Bashkuara për Ukrainën.
Rusia përfaqësohet në samit nga zëvendëskryetari i administratës presidenciale, Maxim Oreshkin, pasi presidenti Vladimir Putin nuk ndodhet aty. Disa vende të tjera gjithashtu nuk dërguan udhëheqësit e tyre më të lartë, përfshirë Kinën dhe Shtetet e Bashkuara.