Kombet e Bashkuara festojnë 75-vjetorin me aktivitete të organizuara kryesisht në internet, ndërkohë që presidenti amerikan, Donald Trump, nuk do t’i drejtohet organizatës për këtë përvjetor, pavarësisht se është planifikuar ta bëjë këtë.
Sekretari i Përgjithshëm i OKB-së Antonio Guterres bëri thirrje për bashkëpunim më të madh ndërkombëtar përballë sfidave globale.
“Sot kemi një tepricë të sfidave shumëpalëshe dhe një deficit të zgjidhjeve shumëpalëshe”, theksoi Gutteres.
“Fatkeqësitë klimatike po afrohen, biodiversiteti po shembet, varfëria po rritet përsëri, urrejtja po përhapet, tensionet gjeopolitike po përshkallëzohen,… pandemia e Covid-19 ka ekspozuar brishtësinë e botës. Ne vetëm mund ta përballojmë së bashku këtë”, shtoi ai.
Duke folur personalisht në sallën e praruar të Asamblesë së Përgjithshme në Nju Jork, kreu i Kombeve të Bashkuara vlerësoi gjithashtu arritjet e institucionit, i cili u krijua në vitin 1945, pas Luftës së Dytë Botërore.
“Asnjëherë në historinë moderne nuk kemi kaluar kaq shumë vite pa një konfrontim ushtarak midis fuqive të mëdha”, tha Guterres.
Udhëheqësit botërorë adresuan ngjarjen e nivelit të lartë përmes fjalimeve të regjistruara paraprakisht në video për shkak të pandemisë së koronavirusit, një format që çoi ekspertin e OKB Richard Gowan të parashikonte “një festë mjaft të zymtë të ditëlindjes për Kombet e Bashkuara”.
Shtetet e Bashkuara të Amerikës, si vendi pritës i Kombeve të Bashkuara, ishin folësit e parë midis shteteve anëtare. Megjithëse Trump u përfshi në axhendën e OKB, ai papritur nuk do i drejtohet samitit.
Në vend të tij, foli zëvendëspërfaqësuesja amerikane në OKB, Cherith Norman Chalet i cila kritikoi rezistencën ndaj reformave, mungesës së transparencës dhe cënueshmërisë ndaj regjimeve autokratike.
“Për administratën Trump, ky përvjetor është një kohë e rëndësishme për të festuar arritjet e shumta të Kombeve të Bashkuara, por me rezerva, pasi ky organ i rëndësishëm duhet t’i shërbejë qëllimit të tij të synuar”, theksoi Chalet.
Trump, i cili shpesh ka kritikuar OKB-në, është gati të trajtojë debatin e përgjithshëm vjetor të Asamblesë së Përgjithshme të saj përmes video-konferencës së ditës së sotme.