Një tërmet i fuqishëm me magnitudë 7.1 ballë ka goditur jugperëndimin e Japonisë, duke shkaktuar dëme të konsiderueshme materiale dhe duke aktivizuar menjëherë ekipet e emergjencës. Forcat e shpëtimit kanë nisur operacionet për gjetjen e personave të bllokuar në një qendër tregtare, ku një pjesë e ndërtesës është shembur si pasojë e lëkundjeve të forta. Sipas autoriteteve lokale, dyshohet se rreth 20 deri në 30 punonjës mund të kenë mbetur nën rrënoja dhe ende nuk janë lokalizuar.
Kërkimet po zhvillohen gjithashtu në një fabrikë letre, e cila raportohet se ka pësuar dëmtime nga tërmeti. Disa media japoneze kanë bërë me dije për viktima të mundshme, por autoritetet ende nuk kanë publikuar një bilanc zyrtar. Lëkundjet sizmike u regjistruan në orën 16:27 sipas kohës lokale dhe shkaktuan dëmtime në infrastrukturë, përfshirë rrugë të dëmtuara, një urë për këmbësorë të shembur dhe ndërprerje të energjisë elektrike për mijëra banorë.
Pamje të shpërndara në rrjetet sociale tregojnë qytetarë duke u evakuuar nga qendra tregtare me ndihmën e stafit. Pak minuta pas tërmetit është raportuar edhe një shpërthim në zonë, i cili dyshohet se mund të ketë ardhur si pasojë e një rrjedhjeje gazi. Autoritetet japoneze vijojnë punën në terren për kërkim-shpëtim dhe po përpiqen të përcaktojnë shkallën e plotë të dëmeve të shkaktuara nga tërmeti.
