Presidenti i SHBA-së, Donald Trump, ka deklaruar se lufta me Iranin mund të përfundojë vetëm pas zgjedhjeve të mesmandatit në nëntor, duke shtuar se çmimet e naftës nuk pritet të bien ndjeshëm deri në atë periudhë.
“Unë mendoj se lufta do të përfundojë menjëherë pas zgjedhjeve, sepse ata nuk do të mund të rezistojnë më gjatë”, tha Trump të mërkurën, teksa udhëtonte drejt Teksasit për konventën e parë të republikanëve për zgjedhjet e mesmandatit.
Trump i përsëriti komentet edhe në Teksas, duke argumentuar se kostoja ekonomike në afat të shkurtër është sacrificë e nevojshme për të parandaluar Iranin të zhvillojë armë bërthamore.
Presidenti amerikan po përballet me rënie në sondazhe dhe me presion nga brenda Partisë Republikane për t’i dhënë fund luftës me Iranin, shkruan A2.
“Menjëherë pas zgjedhjeve, çmimet e naftës do të bien ndjeshëm”, u tha Trump gazetarëve.
Ai akuzoi gjithashtu Iranin se po përpiqet të ndikojë në zgjedhjet amerikane, duke pretenduar se Teherani dëshiron që në Kongres të zgjidhet një grup më i dobët politikanësh, të cilët, sipas tij, do ta lejonin Iranin të zhvillonte armë bërthamore.
Trump nuk paraqiti prova për këtë pretendim. Ndërkohë, Irani ka mohuar vazhdimisht se po synon të zhvillojë armë bërthamore.