Presidenti ukrainas Volodymyr Zelensky ka deklaruar se situata në qytetin lindor të Pokrovsk është “shumë e vështirë”, duke lënë në dorën e komandantëve ushtarakë çdo vendim për tërheqjen e trupave nga zona e konfliktit.
Në një intervistë për Bloomberg TV, Zelensky theksoi se: “Askush nuk po i detyron ata të vdesin për hir të rrënojave. Do t’i mbështes ushtarët tanë, veçanërisht komandantët atje, në përpjekjet e tyre për të kontrolluar situatën. Përndryshe, do të jetë shumë e kushtueshme për ne: gjëja më e rëndësishme për ne janë ushtarët tanë.”
Kjo deklaratë vjen në një moment kritik për forcat ukrainase, të cilat po përballen me presion të shtuar nga trupat ruse në rajonin e Donetskut.
Pokrovsk ndodhet në një zonë kyçe të konfliktit dhe ka qenë objektiv i sulmeve intensive gjatë javëve të fundit. Situata në terren është përkeqësuar ndjeshëm, duke ngritur shqetësime për humbje të mundshme territoriale dhe për sigurinë e trupave ukrainase.
Zelensky ka përsëritur se vendimet për tërheqje apo qëndrim në zonat e luftës nuk merren nga udhëheqja politike, por nga komandantët ushtarakë në terren, të cilët kanë vlerësimin më të saktë të situatës operacionale.
Deklarata e presidentit ukrainas vjen në sfondin e luftës që ka hyrë në vitin e katërt, me intensitet të lartë në lindje të vendit dhe me përpjekje të vazhdueshme për mbështetje ndërkombëtare, furnizime ushtarake dhe zgjidhje diplomatike.