Gati 20 ditë pas tragjedisë së 26 nëntorit Prokuroria dhe Policia e Shtetit kanë nisur arrestimet. Në Durrës, qyteti ku humbën jetën 24 qytetarë në rrënojat e banesave të ndërtuara pa cilësi, policia ka arrestuar dje 9 zyrtarë të administratës dhe punonjës ndërtimit. Ndërkohë 8 të tjerë janë shpallur në kërkim, pasi janë larguar nga vendi që pas tërmetit. Mes të arrestuarve janë ish-drejtorë dhe specialistë të Agjencisë së Legalizimit dhe Urbanizimit të Ndërtimeve Informale, inspektor të Inspektoratit Ndërtimor Urbanistik, dy zyrtarë të Ministrisë së Brendshme që drejtojnë “Kavalishencën” në Durrës si dhe ndërtuese e individë që kanë punuar në objektet e shkatërrua nga tërmeti. Për tetë personat që janë në kërkim policia nuk i publikoi emrat, por “porositi mediat” që të mos spekulojnë me identitet pasi mund të dëmtojnë hetimin. Po nga të dhënat që polica ka shpërndarë, jo zyrtarisht, për mediat afër qeverisë, rezulton se në kërkim janë sërish ish-drejtorë të ALUIZNI-t dhe specialistë të rangjeve të ulëta dhe pronarë të godinave që u shembën. Akuzat që prokuroria ka ngritur ndaj 18 personave nën jetime janë; “vrasje me dashje”, “shpërdorim detyre” dhe “falsifikim dokumentesh”. Ky është hetimi i parë i këtij lloji në Shqipëri dhe prokuroria ka hasur dhe në mungesën e një bazë ligjore të qartë për të nxjerrë përgjegjësitë për viktimat e 26 nëntorit në Durrës. Ndërkohë, arrestimet e djeshme kanë ngritur dhe një sërë pikëpyetjesh për gjetjen e autorëve të vërtetë të masakrës urbane që solli pasojat fatale. Partia Demokratike reagoi dje për faktin se në listën e arrestuarave ishin zyrtarë të shtetit dhe individë që mund të kenë shkelur ligjin, por nuk janë përgjegjësit kryesor. Nënkryetari i PD-së, Edi Paloka përmendi emrin e ish-kryebashkiakut me më shumë mandate në Durrës, Vangjush Dako. Sipas tij, fakti që Dako nuk është përfshirë në hetimin e prokurorisë tregon se kryeministri ka marrë në mbrojte ish-kreun e Bashkisë së Durrësit. Paloka thotë se hetimet e prokurorisë po nxjerrin fajtorë për ndërtimet edhe bojaxhinjtë e pallateve, por jo Vangjush Dakon. “Rama e nxori Gjushin prapë “akullore”!! Sipas drejtuesve të policisë dhe prokurorisë në Durrës: pas “një pune intensive, dy javore” u gjenden dhe “fajtoret” e katastrofës. Plot 17 urdhër ndalime…“Fajtoret” rezultokan disa inspektore lagjesh, ndonjë “ndërtues informal” e me siguri do dalin dhe bojaxhinjtë e pallateve! Gjushit nuk i del emri askund!!!”,- deklaroi Paloka.
Emri i Vangjush Dakos përmendet në denoncimet e opozitës në Durrës jo vetëm për detyrën si kryebashkiak dhe dhënien e lejeve, por dhe për konfliktin e interesit që ka pasur me biznesin familjar. Vetë Vangjush Dako para marrjes së detyrës dhe më pas familjarët ish-kryebashkiku rezultojnë të jenë pronarë të një nga firmave kryesore të ndërtimit në qytetin bregdetar. “Në Durrës e di dhe qytetari me i fundit se Vangjush Dako është kryepërgjegjës për këtë situate, jo vetëm se ka mbi dhjetë vjet që drejton si kryetar bashkie, por edhe sepse privatisht ka qene i implikuar direkt, me firmën e tij “3D”, në ndërtimin e shumicës së pallateve të dëmtuara. Këtë fakt e kanë denoncuar dhe këto ditë me dhjetëra qytetarë durrsak. Gjushi jepte lejet, Gjushi supervizonte, Gjushi jepte betonin e firmës se tij, Gjushi edhe ndërtonte me firmën e tij!”, denoncoi dje numri dy i PD-së, Edi Paloka. Ai shtoi se heqja e Dakos nga lista e personave të arrestuar apo nën hetim tregon se ka mbështetjen direkte të Edi Ramës dhe prokuroria po mbyll skandalin vetëm më ca “koka turku”.
Ndërkohë Prokuroria e Durrësit dje njoftoi se hetimet ende nuk kanë përfunduar dhe pjesë e verifikimeve do jenë jo vetëm pallatet që u shembën, por edhe të tjerë edhe pse i rezistuan tërmetit kanë probleme gjatë ndërtimit. Durrësi për shkak të numri të madh të ndërtimeve është dhe qyteti ku hetimet do të zgjasin më gjatë. Ndërkohë në Thumanë prokuroria ende nuk ka njoftuar se kush janë përgjegjësit që futën banorët në pallatet e dëmtuara që u morën jetën.
Gjithsesi dje filluan arrestimet. Mund të ketë arrestime të bujshme. /Qamil Xhani/