Ka hyrë në fuqi vendimi i qeverisë për rritjen e pagave të punonjësve të Policisë së Shtetit dhe Burgjeve, i cili është publikuar në Fletoren Zyrtarë.
Në vendimin e qeverisë bëhet me dije, se rritja e pagave të punonjësve të policisë vjen në kuadër të paketës së rezistencës sociale ndaj pasojave të krizës.
Më konkretisht rritja e pagave është bërë në bazë të kategorive, duke filluar nga 75 mijë lekë të vjetra, tek 125 mijë lekë të vjetra që shkon për drejtorët e Burgjeve apo Policisë së Shtetit. “Inspektor 57.500; Inspektor i dytë 59.800; Inspektor i parë 62.680; Nënkomisar 70.000; Komisar 77.000; Kryekomisar 87.000; Drejtues 99.000; Drejtues i parë 103.000; Drejtues i lartë 115.000; Drejtues madhor 125.000”, thuhet në njoftim. Rritja për Policinë e Burgjeve Po ashtu, rritje pagash do të ketë edhe për punonjësit e policisë së Burgjeve. “Aspirant 53.500; Nëninspektor 55.700 Inspektor 58.400 Kryeinspektor 64.000; Nënkomisar 70.000 Komisar 77.000 Kryekomisar 99.000; Drejtues 115.000; Drejtues i Lartë 125.000”, thuhet në vendimin e qeverisë që është publikuar në “Fletoren Zyrtare”. Rama: Do të rrisim pagat e punonjësve të policisë
Ndërkohë, kujtojmë se pak ditë më parë ishte kryeministri Edi Rama ai që bëri me dije se qeveria ka marrë vendimin që të rrisë pagat e punonjësve të policisë, policëve të burgjeve, zjarrfikësve, Gardës së Republikës dhe punonjësve të administratës publike. Kryeministri Edi Rama në një konferencë për mediat pas mbledhjes së Këshillit të Ministrave tha se rritja e pagave bëhet për të mbështetur të gjithë ata që janë në krye të detyrës. Rritja do të reflektohet në pagën e ardhshme që do të marrin të gjithë këto kategori.“Policia e Shtetit, nivelet bazë, pra gjithë punonjësit e Policisë në nivel inspektorësh si dhe niveli i mesëm të kenë një shtesë page.
Shtesa më e lartë është për nivelin bazë, shtesa në vijim është për nivelin e mesëm, respektivisht 15% dhe 7%. Po ashtu, e njëjta gjë vlen për Gardën e Republikës, kemi një shtesë page.
E njëjta gjë vlen dhe për Policinë e Burgjeve, kemi një shtesë page. E njëjta gjë vlen për zjarrfikësit, kemi një shtesë page. E njëjta gjë vlen për administratën publike dhe jo vetëm për nëpunësit në shërbimin civil, por edhe për gjithë punonjësit mbështetës dhe të gjitha këto vendime hyjnë në fuqi menjëherë”, tha Rama