Nesër pritet të takohen Albin Kurti dhe Presidenti Hashim Thaçi, por analisti Enver Bytyçi është i mendimit se mandatimi nuk do të ndodhë.
Kjo për disa faktorë të brendshëm, siç është mos arritje e një marrëveshje me LDK-në. Për një faktor i jashtëm, për mos arritjen e formimit të qeverisë në Kosovë është edhe marrëdhënie me Tiranën zyrtare.
Sipas Bytyçit, Kosova për herë të parë në historinë e saj që kur është çliruar nga Serbia nuk ka mbështetjen e duhur nga qeveria e Tiranës.
Enver Bytyçi: Kosova, për herë të parë në historinë e saj prej kur është çliruar nga pushtimi serb, por edhe që kur ka shpallur pavarësinë nuk ka mbështetjen e duhur nga qeveria e Tiranës. Kemi të bëjmë me një qeverisje në Tiranë që shkon kundër rrymës së zhvillimit të politikave. Kemi të bëjmë me një qeverisje në Tiranë që vetëm kritikon, akuzon dhe ironizon me tezën se “ju nuk jeni të aftë të krijoni një qeveri dhe jo më të merrni përsipër problematika më të gjera në rajon”. Pra kemi të bëjmë me rrethana të tilla që janë në disfavor të arritjes së një marrëveshje të plotë, efektive mes dy forcave politike.
Për Bytyçin, Tirana zyrtare nuk duhet të ndërhyjë në jetën politike të Kosovës ose të shqiptarëve të Maqedonisë së veriut, por duhet të konsultohet. Sipas tij, mes Tiranës dhe Prishtinës nuk ka një komunikim dhe kjo është në favor të Serbisë.
Enver Bytyçi: Por konsultimet me Tiranën zyrtare, komunikimi me Tiranën zyrtare nuk kanë munguar. Sot ne jemi në një situatë kur Tirana dhe Prishtina nuk flasin me njëra-tjetrën. Ky është një andikap i jashtëzakonshëm, është një aset i pikuar nga qielli për Serbinë. Një marrëdhënie e tillë konfliktuale mes Tiranës dhe Prishtinës shkon 100% në dobi të interesave të Serbisë dhe politikës serbë për të destabilizuar Kosovën, për të shkatërruar shtetësinë e saj dhe për të eliminuar nga harta politike shtetin e Kosovës.