Kryetari i Lidhjes Demokratike të Kosovës (LDK), Lumir Abdixhiku, ka bërë të ditur se partia e tij nuk do të kërkojë përfshirje në qeveri, duke hequr dorë edhe nga kërkesa për postin e Presidentit. Pas mbledhjes së grupit parlamentar, Abdixhiku tha se LDK-ja nuk pranoi ofertën e Lëvizjes Vetëvendosje (LVV), të cilën e konsideroi të pamjaftueshme për një bashkëpunim politik të barabartë.
Sipas tij, LDK-së i ishin propozuar vetëm tri ministri dhe posti i zëvendëskryeministrit. Abdixhiku theksoi se kërkesa për Presidencën kishte qenë pjesë e përpjekjes për të krijuar një ekuilibër institucional, por tashmë kjo kërkesë është tërhequr.
“LDK tërhiqet nga çdo kërkesë për pjesëmarrje në qeveri dhe heqim dorë nga kërkesa për presidentin”, deklaroi ai. Kreu i LDK-së kritikoi gjithashtu mënyrën se si, sipas tij, LVV-ja u soll pas refuzimit të ofertës për bashkëqeverisje, duke e cilësuar atë si një betejë publike ndaj partisë së tij.
Abdixhiku tha se LDK-ja mbetet e gatshme të kontribuojë në zgjedhjen e një presidenti që sipas tij do të mbrojë interesat e vendit. “LVV le ta ketë gjithë pushtetin siç e ka kërkuar. Ne nuk jemi dekor e as alibi për dështimin”, u shpreh Abdixhiku, duke konfirmuar se LDK-ja do të qëndrojë në opozitë.
Në zgjedhjet e dhjetorit 2025, partia e Albin Kurtit mori 57 mandate dhe vendi është në rrezik të shkojë sërish në zgjedhje.
Si zgjidhet presidenti?
Raundi i parë: kandidati duhet të marrë 2/3 e votave të të gjithë deputetëve. Me 120 deputetë, kjo është 80 vota.
Raundi i dytë: nëse askush nuk i merr 80 vota, zhvillohet një votim i dytë, përsëri me kërkesën për 2/3.
Raundi i tretë: nëse përsëri nuk ka 80 vota, garojnë vetëm dy kandidatët që kanë marrë më shumë vota në raundin e dytë. Në këtë raund mjafton shumica e të gjithë deputetëve, pra 61 vota.
Nëse dështon edhe raundi i tretë, Kuvendi shpërndahet dhe duhet të mbahen zgjedhje të reja parlamentare brenda 45 ditësh.