Pas ndarjes nga jeta të ish-kryeministrit të Shqipërisë, Fatos Nano, një mesazh ngushëllues është dërguar nga familja e ish-presidentit dhe ish-kryeministrit të Kosovës, Hashim Thaçi, drejtuar familjes Nano.
Në mesazhin e bërë publik, familja Thaçi e vlerëson Nanon si pjesë të një brezi politikanësh që transformuan politikën shqiptare, duke e çuar vendin nga sistemi monist drejt demokracisë pluraliste.
“Me shpirtin reformator, tolerancën dhe kulturën politike moderne, ai dha shembullin e një lideri të pjekur, duke i hapur udhë brezit të ri politik,” thuhet në mesazh.
Familja Thaçi thekson gjithashtu kontributin historik të Fatos Nanos në mbështetje të çështjes së Kosovës, si në periudhën e paraluftës ashtu edhe gjatë viteve 1998–1999, duke e cilësuar atë si një trashëgimi të çmuar kombëtare.
“Përkrahja që z. Nano i dha çështjes së Kosovës është historike dhe kontributi i tij mbetet një trashëgimi e vlerave tona kombëtare. Kujtimi për të do të mbetet i përjetshëm,” përfundon mesazhi nga familja Thaçi.