Avokati Gentian Rumano komenton mbledhjen e këshillit bashkiak të Tiranës që do të mbahet nesër për shkarkimin e Erion Veliajt nga posti i kryetarit të Bashkisë së Tiranës. Rumano tha se kryetari gëzon të drejtën që të jetë prezent në mbledhje dhe këshilli bashkiak duhet të sigurohet që kryetari të paraqitet dhe nëse procedura nuk zbatohet atëherë avokatët e Veliajt mund t’i drejtohen Gjykatës Kushtetuese. Sipas avokatit vendimi për shkarkimin e tij mund të rrëzohet nga Gjykata nëse Këshilli nuk zbaton procedurën administrative.
“Mund të paraqitet kërkesë për shkarkimin e kryetarit pikërisht për ato tre pika që paraqet neni. Shkaku kryesor është fakti që nuk është paraqitur për më shumë se 3 muaj, shkak i cili nuk është i kontrollueshëm nga Veliaj sepse është ndaluar nga Gjykata. Nuk kemi një dënim të formës së prerë, nuk kemi mosparaqitje të vullnetshme. Nesër mund të shkarkohet kryetari i bashkisë, por për këtë shkak që nuk është në vullnetin e Veliajt, ka hapësirë ligjore për kundërshtim nga avokatët e tij.
Këshilli Bashkiak duhet të marrë masat që Veliaj të jetë prezent, duke njoftuar Drejtorinë e Burgjeve që Veliaj të shoqërohet dhe të paraqitet në mbledhje. Në mungesë ai mund të gjykohet vetëm nëse shpreh vullnetin për mos tu paraqitur. Kemi dy raste që shoqërimi është bërë nga Drejtoria e Burgjeve, rastin e Ilir Beqjat dhe rastin e Sali Berishës.
Nëse Veliaj kërkon të ankimojë vendimin e këshillit bashkiak për shkarkim, ai mund t’i drejtohet Gjykatës Kushtetuese. Vendimmarrja nga këshilli mund të jetë politik, por mos zbatimi i procedurës nga këshilli është ligjor dhe nëse nuk paraqitet Veliaj, gjykata mund të rrëzojë vendimmarrjen e këshillit”, u shpreh avokati, Gentian Rumano.