Detaje të reja janë bërë të ditura nga vrasja e ndodhur mbrëmjen e sotme në lagjen nr. 14 të Korçës, ku një 20-vjeçar u qëllua për vdekje me armë zjarri. Viktima është identifikuar si J.Z, rreth 20 vjeç, i cili, sipas të dhënave paraprake, ishte pjesë e Forcave të Armatosura.
Zuko dyshohet se është qëlluar me armë zjarri, ndërsa burimet paraprake bëjnë me dije se në krim mund të jetë përdorur një armë tip kallashnikov. Pas ngjarjes, autori i dyshuar është larguar nga vendi i krimit. Policia ka arritur të identifikojë të dyshuarin dhe ka nisur kërkimet për kapjen e tij. Në disa pika janë ngritur postoblloqe, ndërsa kontrollet vijojnë në zona të ndryshme.
Grupi hetimor ndodhet në terren dhe po punon për të dokumentuar provat dhe për të rindërtuar dinamikën e ngjarjes. Paralelisht, hetuesit po përpiqen të zbardhin motivin e vrasjes dhe nëse viktima dhe autori kanë pasur më herët konflikte apo njohje me njëri-tjetrin.
