Presidenti Ilir Meta, në një intervistë për emisionin “Opinion” në televizionin “Klan” ka shpjeguar gjithë procedurën që ka ndjekur për emërimet në Gjykatën Kushtetuese dhe debatin me mazhorancën.
Lidhur me krizën politike, Presidenti ka kritikuar dhe qëndrimet e opozitës. Ai tha se PD dhe LSI i kanë lënë qytetarët të ekspozuar dhe të pa mbrojtur para një bande.
“PD dhe LSI janë më shumë pranë qeverisë se sa Presidentit. Me ato akte e veprime që kanë bërë deri tani, siç është dhe djegia e mandateve, e dëshmon këtë. PD dhe LSI i kanë lënë rrugë të hapur kapjes së institucioneve nga Rama. PD dhe LSI e kanë lënë Presidentin të ekspozuar ndaj një bande. Por unë do flasë dhe me popullin dhe ta dinë mirë se unë nuk jam i vetëm. Unë kam popullin dhe do flas me ta. Një deklaratë bëra në Pogradec dhe doli në 1 mijë media ndërkombëtare, ndaj e them që ta dinë mirë ata kur flet Ilir Meta dhe i drejtohet popullit, se….”,- tha Presidenti.
Lidhur me akuzat e PS se kreu i shtetit po pengon reformën, Meta tha se sot janë betuar anëtarët e rinj të Gjykatës Kushtetuese dhe pas dy vitesh pezullim, kjo gjykatë është funksionale. Në këtë mënyrë, kreu i shtetit tha se roli i tij jo vetëm s’ka qenë bllokues, por ka kërkuar nisjen sa më parë të punës nga gjithë institucionet.
Në emisionin “Opinion”, Presidenti Meta ka bërë një deklaratë të fortë lidhur me tentativën e PS për të marrë institucionin e Presidentit të Republikës. “Rama kërkon një President që të hedhë nja 2-3 firma në atë zyrë për të hedhur në erë interesat e shqiptarëve dhe interesat e kombit. Ta harrojë! Sa të jem unë në atë zyrë deri në 24 korrik 2022 ato firma nuk do hidhen. Do vijë koha të flas dhe çfarë firma kërkohen. Por e përsërisë ta harrojnë që unë do t’i hedh ato firma!”,- deklaroi Meta.
Lidhur me qëndrimet e disa diplomatëve në Tiranë, Meta tha: “Pse sa herë nderohet një mandat ambasadori unë do pranoj të ndryshoj e të shkel Kushtetutën? Unë do mbroj Kushtetutën e Republikës që kemi miratuar me ndërkombëtarët”.
Duke ju përgjigjur akuzave të PS se ka frikë nga reforma në drejtësi, Presidenti tha “unë të kem frikë nga SPAK i Ramës dhe Ulsit? Boll me këto marrëzira, se na e bëtë Ulsiun si Uliksin”.
I pyetur për akuzat që Dovrani ka bërë sot në një reagim publik kundër institucionit të Presidentit të Republikës, Meta tha: “Asistencë mjekësore nuk i ofroj dot Dvoranit. Ky person ka shqetësim etikën e Presidentit dhe jo faktin që është bërë palë e një plani mafioz për të hedhur në erë themelet kushtetuese të shtetit të së drejtës!”.
Ilir Meta ishte i drejtëpërdrejtë dhe i pamëshirshëm ndaj PS, Kryeministrit, por edhe PD e LSI.
