Protesta kundër qeverisë këtë mbrëmje shënon ditën e 24-tër, por sonte një qytetare me fëmijë në krahë iu kundërvu aktivistit Arben Kola (një nga drejtuesit kryesor të protestës), duke i kërkuar që protesta mos të vijonte më në rrugë paqësore. Ajo kritikoi sjelljen e organizatorëve të protestës ndaj emigrantëve dhe i akuzoi si shkak që po zhbëjnë protestën çdo ditë. Më tej, i tha se njerëzit duan të ikin drejt Parlamentit (gjë që të pranishmit e brohoritën) dhe jo Kryeministrisë, por organizatorët i pengojnë.
Vajza: Erdhën emigrantët dhe i përzutë!
Arben Kola: Kush i përzunë?
Vajza: I përzutë ju, s’i latë të flisnin! U bë rrëmujë aty! Po bie protesta çdo ditë prej jush! Ne duam të ikim te parlamenti tani, pse na drejtoni te kryeministria! Kush je ti që më drejton mua?
Thirrje në kor: Bravo!
Arben Kola: Ik, e lirë je!
Vajza: Ju të ndaloni, thoni mos!
Një qytetare: Bravo, ke shumë të drejtë! Edhe unë u habita, gjithë ajo autokolonë!
Arben Kola ngriti sërish megafonin duke shqiptuar sërish “dorëheqje”, por vajza nuk u spraps. Në mes të kësaj situate Arben Kola nis marshimin, ndërsa vajza e pyet: “Pse ikën o zotëri, pse nuk dëgjon?” Marshimi vijoi drejt kryeministrisë, ndërsa Kola bënte thirrjet “bashkohuni me ne” e “Shqipëri e re”. Vajza vijonte të fliste edhe kundër qeverisë Rama, një tjetër qytetare iu bashkua mendimit të saj për aktet e organizatorëve. “Këta po na mbledhin dhe po na tallin!”, tha ajo.