Lionel Messi nuk arriti të mbrojë titullin botëror me Argjentinën. “Albicelestët” u mposhtën 1-0 nga një Spanjë dominuese në finalen e Kupës së Botës, duke i dhënë fund ëndrrës për një triumf të dytë radhazi.
“La Roja” fitoi titullin e saj të dytë kampion bote, pas atij të vitit 2010, duke konfirmuar dominimin në futbollin ndërkombëtar pas suksesit edhe në Kampionatin Evropian. Heroi i finales ishte Ferran Torres, i cili realizoi golin vendimtar në minutën e 106-të të kohës shtesë.
Ndeshja u dominua nga spanjollët, ndërsa Argjentina zhvilloi një paraqitje zhgënjyese, duke mos regjistruar asnjë goditje në portë gjatë gjithë finales. Situata u bë edhe më e vështirë për kampionët në fuqi në minutën e 93-të, kur Enzo Fernandez u ndëshkua me karton të kuq, duke e lënë skuadrën me një lojtar më pak në momentet vendimtare të sfidës.
Lionel Messi nuk arriti të ndikojë në lojë dhe u neutralizua plotësisht nga mbrojtja spanjolle, ndërsa Lautaro Martinez nuk u aktivizua fare gjatë takimit.
Me këtë fitore, Spanja rikthehet në majën e futbollit botëror, duke ngritur për herë të dytë në histori trofeun e Kupës së Botës, ndërsa Argjentina largohet nga finalja pa arritur të mbrojë kurorën e fituar katër vite më parë.