Kryetari i Partisë Demokratike, Sali Berisha, ka reaguar pasi Qeveria nisi procedurat për zgjidhjen e kontratës koncesionare të Aeroportit të Vlorës, pas zvarritjes së punimeve për shkak të mos-marrëveshjeve mes kompanive “MABCO” të drejtuar nga biznesmeni Behgjet Pacolli dhe 2A Group të drejtuar nga biznesmeni Valon Ademi.
Gjatë një konference për mediat, Berisha tha se zgjidhja e kontratës do të bëhet me qëllim që kryeministri Edi Rama, kreu i Grupit të PS-së, Taulant Balla dhe ish-zv.kryeministrja Belinda Balluku t’i marrin biznesmenit Behgjet Pacollit aksionet.
Berisha tha gjithashtu se, në rast të ndërprerjes së kontratës koncesionare të aeroportit të Vlorës, shteti shqiptar do të gjobitet në arbitrazh me të paktën 500 milionë euro.
“Shqiptarët, për pasurimin e Edi Ramës dhe lubi Ballukut, për plaçkitjen nga ana e tyre të të paktën 130 milionë eurove, po prishin një kontratë, për të cilën garantoj qytetarët e këtij vendi se do të gjobiten me të paktën 500 milionë euro. Po e prishin kontratën vetëm e vetëm sepse e panë që Behgjet Pacolli nuk ka ndërmend t’u njohë atyre aksionet, të cilat këta pretendojnë se kompania turke ia ka dorëzuar Pacollit në pronësi të tyre.
Pra, këtu është një treshe faqezezë: Edi Rama, Lubi Balluku dhe Taulant Balla, të cilët kanë përdorur ortakun tjetër të ndërtimit për t’ia marrë Pacollit aksionet. Pacolli nuk i jep aksionet. Është biznesmen me eksperiencë dhe duket se nuk plotëson kërkesat e tyre për pazar.
Janë ndër më qesharaket në botë proceset që lidhen me këtë dosje. Edhe dëshmia që Pacolli ka dhënë, se si u thirr nga Belinda dhe se si Belinda u veçua me biznesmenin turk, dëshmon qartësisht, sipas Berishës, se Rama, Balluku dhe Taulant Balla janë pretendentët kryesorë të aksioneve që, sipas tij, biznesmeni turk ka dorëzuar”, tha Berisha.