Presidenti i Republikës, Bajram Begaj, priti sot në një takim përfaqësuesit gjermanë të fondacionit “Konrad Adenauer”, Dieter Althaus, ish-kryeministër i Landit të Turingisë dhe anëtar i bordit të fondacionit, si dhe drejtuesin e “Konrad Adenauer” në Shqipëri, Thomas Kunze.
Gjatë takimit, Presidenti Begaj shprehu mirënjohjen për mbështetjen e vazhdueshme të Gjermanisë ndaj Shqipërisë në procesin e anëtarësimit në Bashkimin Evropian.
Kreu i Shtetit vlerësoi gjithashtu kontributin e fondacionit “Konrad Adenauer” në Shqipëri, veçanërisht në mbështetjen e reformave që synojnë forcimin e demokracisë, shtetit të së drejtës dhe institucioneve demokratike.
Begaj theksoi se Shqipëria po përparon në mënyrë të qëndrueshme drejt anëtarësimit në BE, ndërsa reformat, sundimi i ligjit dhe forcimi i institucioneve të drejtësisë mbeten në fokus të këtij procesi.
Sipas Presidentit, vendi po vijon përafrimin me standardet dhe politikat e Bashkimit Evropian, me synimin për të përmbyllur kapitujt e negociatave deri në fund të vitit të ardhshëm.
Në takim u diskutua edhe për marrëdhëniet mes Shqipërisë dhe Gjermanisë, me theks te nevoja për forcimin e mëtejshëm të bashkëpunimit ekonomik dhe tregtar.
Palët vlerësuan se marrëdhëniet e mira politike mes dy vendeve duhet të shoqërohen me një intensifikim të bashkëpunimit në fushën e ekonomisë, tregtisë dhe turizmit.
