Deputeti i PS-së, Erion Braçe kërkon ndryshime në Kodin Penal. Duke u ndalur tek ngjarja në Durrës, aty ku dy fëmijë humbën jetën, Braçe nga foltorja e Kuvendit tha se kemi të bëjmë me një vrasje me dashje, dhe se nuk mund t’i hiqen vetëm pikët e patentës.
”Fjalët që duhet të thuhen këtu duhet të kenë logjikë. Nëse ka një qeveri që në dy periudha të ndryshme ka dhënë naftë pa akcizë dhe pa pagesë fare, është qeveria Rama dhe Nano. Unë u çova për një tjetër shqetësim: dy familje përcollën sot pa shpirtin e tyre. Kush ka fëmijë e di mirë këtë. Një i tretë ka një traumë të rëndë emocionale dhe mendore. E gjitha është pasojë e një krimi të rëndë në një rrugë lagjeje. Për mua është vrasje me dashje dhe asnjëherë aksident apo shkelje e rregullave.
Kjo është një ngjarje e përsëritur. Dje kam publikuar një video ashtu siç ishte, për të refuzuar normalizimin e një krimi të tillë. Kodi Penal e normalizon një krim të tillë. Një person i pirë, jo thjesht i dehur, por më keq, që ngas makinën në rrugë, ndonjëherë shoqërohet dhe dërgohet në paraburgim. Pastaj lirohet pas dy ditësh dhe procedohet në gjendje të lirë. Morali është se ti mund të pish, të dehesh, të ngasësh makinën, të ndalohesh, të shkosh në paraburgim, por nga ana tjetër të hiqen vetëm pikë nga patenta. Dhe, në rast se ke para, paguan dyfishin e gjobës dhe nuk të pezullohet patenta.
E bën një herë, dy herë, dhe mund të shkosh deri në 18 muaj ndalim drejtimi. I hiqen vetëm 10 pikë nga patenta. Ndërkohë, ai po hetohet për shkelje rregullash dhe largim nga vendi i aksidentit. Ky është profili i një të forti që dehet dhe vret njerëz. Kjo nuk është shkelje rregullash, është vrasje. Nëse duam të bëjmë diçka, duhet të reformulojmë Kodin Penal dhe këto akte t’i trajtojmë si vrasje me dashje”, u shpreh Braçe.