Kryetari i Partisë Demokratike, Sali Berisha, ka kritikuar qeverinë për çmimin e lartë të karburanteve në Shqipëri, duke deklaruar se nafta është e papërballueshme për qytetarët në raport me nivelin e pagave.
Në një deklaratë publike, Berisha tha se çmimi i naftës, që sipas tij ka arritur në 220 lekë për litër, është ndër më të lartët në botë në raport me të ardhurat e qytetarëve.
Sipas kreut të PD-së, një nga shkaqet kryesore të këtij çmimi është niveli i lartë i taksave që shteti aplikon mbi karburantin. Berisha pretendoi se taksimi arrin në rreth 1.1 euro për litër.
“Nafta 220 lekë është çmimi më i lartë në botë në proporcion me pagat. Edhe në nominal është një nga çmimet më të larta në botë”, deklaroi Berisha.
Ai krahasoi situatën në Shqipëri me atë në Kosovë dhe Maqedoninë e Veriut, duke pretenduar se taksimi i karburantit në këto vende është më i ulët dhe se nafta shitet më lirë.
Berisha tha gjithashtu se Partia Demokratike, nëse do të vijë në pushtet, synon të përgjysmojë taksën mbi naftën.
“Jemi zotuar që në mbledhjen e parë të qeverisë së PD-së do të përgjysmojmë taksën për naftën dhe nuk do të shitet litër nafte në Shqipëri më shtrenjtë se në Kosovë e Maqedoni”, u shpreh ai.