Ish-ministri i Drejtësisë, juristi Ylli Manjani ka reaguar për vendimin e kryetarit të GJKKO-së, Erion Bani, që censuron mediat për të marrë pjesë në seancat gjyqësore. Për të çdokush që ka interes të dijë se çfarë ndodh në sallën e gjyqit, duhet të ketë mundësi ta bëjë këtë gjë. Manjani ka propozuar gjithashtu edhe një metodë për të ndjekur seancat gjyqësore live në GJKKO. Ai tha se kjo gjë mund të bëhet përmes një web-kamer, e cila do të transmetonte live në kohë reale gjithçka që ndodh gjatë seancës. Në linkun e kësaj web-kamer, sipas Manjanit duhet të kenë akses edhe gazetarët.
”Unë kam këtë bindje, që ka një zgjidhje që i përfshin të gjitha problemet. Zgjidhja është që në sallën e gjyqit të jetë një kamer, që transmeton në kohë reale në një link gjithçka ndodh në sallën e gjyqit. Ky link duhet të jetë i aksesueshëm nga gazetarët, nga mediat. Mund ta bësh edhe nga zyra jote dhe t’i të kuptosh gjithçka ndodh aty. Gjyqi është i hapur dhe nuk ka pse të jetë debati mbyllet apo nuk mbyllet. Rastet e mbylljes së gjyqit duhet të jenë shumë të rralla. Ky është koncepti i gjykatës së hapur.
Sepse nga njëra anë nxitet përdorimi i teknologjisë, nga ana tjetër duke hequr teknologjinë nga salla e gjyqit me ça të shkojmë tani, me karroca supermarketi me dosje. Nuk shkon kjo gjë. Ju e keni parë salla e gjyqit ka edhe ekran, edhe televizor. Pra duhet harmonizuar në raport me kohën ku jetojmë hapja e procesit. Kjo është më e mirë se hapja e procesit me dokumenta konfidenciale që dalin rrugëve.
Për mendimin tim kjo është mënyra më e mirë, një web-kamer në sallën e gjyqit që të transmetojë çdo gjë në kohë reale. Çdokush që ka interes çfarë ndodh në sallën e gjyqit duhet të ketë mundësinë ta bëjë këtë gjë. Gazetarët me pak më shumë përparësi. Sepse edhe futja e kamerës për të bërë një plan në një sekuencë të caktuar dhe pastaj t’i ta përdorësh planin si të duash ti, kjo nuk është normale. Jo mo thuaje planin nga fillimi në fund. Shumica e punës në sallën e gjyqit bëhet me celular dhe Ipad. Nëse gjykata vendos këtë, unë nuk bëj dot gjyqe. Pengohem në ushtrimin e detyrës për të mbrojtur klientin. Po prokurori pse ka celular në sallën e gjyqit?”, tha Manjani.