Kryetarja e re e Këshillit Kombëtar, Julia Emiri, ka thirrur mbledhjen e këtij forumi për kupolën duke nisur nga nënkryetarët, sekretarin e pergjithshëm dhe gjithë sekretariatin. Ekipi që do të ndihmojë Kryetarin në drejtimin e Partisë:
1-Sekretari i Përgjithshëm
2-Nënkryetarët e PD-së
3-Sekretariati i PD-së;
4-Komisioni i Apelimit të PD-së.
Flamur Noka është në rrugën e rikonfirmimit si Sekretar i Përgjithshëm i PD, ndërsa ende nuk është bërë i ditur emri i një sfidanti përballë tij. Zgjedhja e Gazment Bardhit si nënkryetar nuk pritet të jetë surprizë, pasi ai mban edhe postin e kryetarit të grupit parlamentar. Sipas statutit, kryetari i grupit parlamentar duhet të mbajë edhe postin e nënkryetarit të partisë.
Pikëpyetje mbetet nëse Agron Gjekmarkaj do të vijojë të mbajë detyrën e nënkryetarit. Në garën për postet e nënkryetarëve pritet të jenë edhe emrat e Luçiano Boçit, Klevis Balliut dhe Belind Këlliçit. Pritet që në drejtimin e partisë të ketë edhe një përfaqësim nga gratë. Një prej emrave të përfolur është Erisa Bajaziti.
Me zgjedhjen e drejtuesve të rinj përfundon ripërtëritja e një pjese të partisë, pasi Sali Berisha ka premtuar edhe lëvizje në radhët e drejtuesve të qarqeve. Nga ana tjetër ndryshime priten dhe në drejtimin e forumit rinor dhe atë të gruas, ku Besart Xhaferri dhe Albana Vokshi pritet të mos garojnë për një mandat tjetër.