Deputeti i PS-së, Erion Braçe ka vendosur ta rikthejë në shtator në Kuvend një propozim që sipas tij prej dy vitesh nuk po gjen mbështetje brenda maxhorancës socialiste. Ai kërkon sërish që grave me patologji gjinekologjike të diagnostikuara, si endometrioza dhe adenomioza, t’u njihet me ligj një ditë pushim e paguar, e dhënë vetëm me vlerësim të mjekut. Shkas për reagimin është bërë lajmi që Mali i Zi u njeh grave dy ditë pushim gjatë ciklit menstrual. Deputeti socialist thotë se Shqipëria ka humbur dy vite pa e diskutuar seriozisht këtë nismë, edhe pse, sipas tij, brenda shumicës i është pranuar se bëhet fjalë për një propozim të drejtë.
Postimi i plotë
Mali i Zi i njeh vajzave dhe grave dy ditë pushim gjatë ditëve të ciklit të tyre, Mali i Zi, ej! Dy vite kam që i kërkoj qeverisë që të njohë këtë të drejtë për vajzat dhe gratë dhe të trajtojë një gjendje shëndetësore reale, periodike dhe, në raste të caktuara, individuale.
Kjo lidhet tërësisht me patologji të diagnostikuara, si endometrioza, adenomioza dhe sëmundje të tjera gjinekologjike, të cilat gjatë periudhës së ciklit shkaktojnë dhimbje të mëdha te vajzat dhe gratë. Një ditë pushim të paguar për to, e vlerësuar kjo nga mjeku! E gjitha lidhet me shëndetin riprodhues, në një vend që përballet dukshëm me rënie të numrit të lindjeve.
Prej dy vitesh e propozoj këtë nismë dhe tërhiqem, sepse më thuhet se do të votohet kundër. Por, që të votohet kundër, duhet kohë për t’u rikthyer sërish me të njëjtën çështje. Nuk e kam kuptuar kurrë pse duan ta votojnë kundër! Kur e thashë për herë të parë, disa “gomarë” televizivë apo online, të paguar nga biznesmenët e këtij vendi, u shqetësuan shumë se kush do të punonte nëse do të vendosej një masë e tillë. Të jetë interesi i biznesmenëve një pengesë, mund të diskutohet, por padija mbetet një pengesë reale.