Ministri i Infrastrukturës dhe Energjisë, Enea Karakaçi inspektoi këtë të hënë punimet në ujësjellësin e qytetit të Elbasanit, një investim i financuar nga Banka Gjermane KfW me vlerë rreth 13 milionë euro.
Projekti ka mundësuar përmirësimin e ndjeshëm të furnizimit me ujë të pijshëm në qytet, duke siguruar aktualisht furnizim 24 orë për rreth 60% të popullsisë së Elbasanit. Investimi përfshin rehabilitimin e dy depove ekzistuese me kapacitet 2000 m³ secila, si dhe ndërtimin e një depoje të re me të njëjtin kapacitet, e ndarë në dy seksione. Këto ndërhyrje kanë rritur si cilësinë, ashtu edhe sasinë e ujit të pijshëm, si dhe kanë ulur humbjet në rrjet.
“Pas këtij investimi, përgatitemi për fazën e radhës që synon mbulimin 100% të qytetit me furnizim 24 orë ujë”, tha Karakaçi, duke theksuar se do të vijojnë investimet edhe në stacionet e pompimit për rritjen e eficiensës energjetike.
Ai shtoi se reforma në sektorin e ujësjellës-kanalizimeve dhe bashkimi i shoqërive ka sjellë përmirësim të ndjeshëm të performancës financiare të ndërmarrjes në Elbasan, duke arritur nivele arkëtimi 105%, përfshirë edhe detyrimet e prapambetura. Aktualisht ujësjellësi i Elbasanit mbulon 100% të kostove të energjisë elektrike.
Projekti përfshin gjithashtu automatizimin e sistemit të furnizimit me ujë dhe monitorimin në distancë përmes një sistemi SCADA, duke mundësuar kontroll më të mirë të depove dhe rrjetit, si dhe rritje të cilësisë së shërbimit për qytetarët.
Ministri theksoi edhe se investime të tjera në sektorin e ujësjellësit të Elbasanit do të vijojnë edhe në buxhetin e vitit 2026, me fokus të veçantë në rritjen e eficensës energjetike dhe përmirësimin e mëtejshëm të shërbimit.