Partia Socialiste duket e vendosur të vijojë deri në fund me propozimin për riorganizimin e pushtetit vendor, duke e çuar numrin e bashkive nga 61 në 46. Pavarësisht kundërshtive të shprehura nga këshillat vendorë të bashkive që preken nga reforma, mazhoranca e konsideron draftin si alternativën më të përshtatshme në kushtet aktuale. Deputeti socialist dhe një prej nismëtarëve të propozimit, Arbjan Mazniku, deklaroi në një intervistë për A2 CNN se ndryshimi i hartës territoriale synon një organizim më funksional të pushtetit vendor.
Një nga çështjet e debatit lidhet me statusin e qyteteve që, sipas propozimit, nuk do të kenë më këshill bashkiak dhe kryetar të zgjedhur. Mazniku ka mbrojtur konceptin e ri të organizimit territorial, ndërsa propozimin e opozitës për 100 bashki e ka konsideruar si një rikthim te modeli i ndarjes së dikurshme në komuna.
Mazniku ka lënë gjithashtu të hapur mundësinë që harta territoriale të rishikohet sërish në të ardhmen, duke mos përjashtuar një reduktim të mëtejshëm të numrit të bashkive. Reforma ka hapur debat edhe për ndikimin e saj të mundshëm elektoral. Pyetja që ngrihet nga opozita dhe aktorë të tjerë politikë është nëse shkrirja e 15 bashkive mund të ndryshojë balancat politike në favor të Partisë Socialiste.
Debati pritet të zhvendoset këtë të premte në Komisionin e Ligjeve, ku socialistët do të përballen me argumentet e bashkive që kundërshtojnë shkrirjen. Të hënën pritet shqyrtimi nen për nen i draftit, ndërsa më pas projektligji synohet të kalojë për votim në seancën plenare të së enjtes. Nëse miratohet, reforma do të shënojë një tjetër ndryshim të rëndësishëm në organizimin territorial të Shqipërisë.